Abahanga mu birebana n’inkingo bemeza ko kuba hari abasaga 400 banduye COVID-19 nyamara barakingiwe  nta mpungenge biteye, bitewe n’uko badashobora kuremba nk’abatarakingiwe.

Bavuga kandi ko kuba hari 3 imaze guhitana nyamara bari mu bakingiwe, nabyo ngo bishobora guterwa n’indwara zidakira baba basanganywe ariko badahitanywe na COVID-19.

Bamwe mu bahawe urukingo rwa  mbere n’urwa kabiri rwa COVID-19, banenga bagenzi babo bahawe urwo rukingo batangiye gukerensa iyi virusi bitwaza ko bamaze gukingirwa, ko nta mpungenge bafitiye iki cyorezo bitewe n’uko bashobora gushyira ubuzima bwa benshi mu kaga harimo n’imiryango yabo.

Mu cyumweru gishize gusa, ikigo cy’ubuzima RBC cyavuze ko abantu 400 bari bamaze kuyandura, ndetse kuri uyu wa kabiri Minisitiri w’Ubuzima Dr. Ngamije Daniel, yavuze ko hari abandi 35 bari barakingiwe bayanduye.

Yagize ati “Mu bantu twasuzumye ejo n’ejobundi harimo abasaga 35 banduye kandi bari barakingiwe, ndetse bamwe baranakingiwe inkingo zombi.  Icya ngombwa ni uko uwakingiwe ntaremba arandura nyine ukamusangamo COVID19 igihe umusuzumye, ariko ntabwo usanga yazanye ibimenyetso mpuruza ngo usange yaje kwa muganga.”

“Nta numwe turajyana mu bitaro yarembye, bivuze ngo urukingo rufite akamaro tugomba kurwitabira ariko tukanamenya ko uwakingiwe agomba kwitwararika kugirango atandura ngo yanduze nabandi.”

RBC ivuga ko ku bw’ibyago, abantu 3 bari barakingiwe byaje kugaragara ko bapfuye bazize indwara zidakira.

Mu myaka 45 amaze mu mwuga, impuguke mu buvuzi akaba n’umuganga mukuru mu ivuriro Polyclinique du Plateau, Dr. Antoine Muyombano avuga ko urukingo rwongerera umubiri ubudahangarwa ku buryo iyo virusi iwugezemo abasirikare bayirwanya.

Yagize ati “Iyo umuntu yakingiwe ni kimwe no kumuha ka gakoko bashegeshe bamazemo uburozi, ariko basigiye ubushobozi bwo kurinda indwara. Gukingira rero ni kimwe n’urukingo rw’iseru, ni kimwe no gutera umwana agakoko gatera iseru ariko batse bwa bushobozi kugirango bagasigire ububasha bwo kurinda ya ndwara umubiri. Rero iteka iyo uhuye n’ako gakoko ukamenya ko ugomba kwirwanaho ugasa n’aho wohereza ba basirikare bawurinda, ni kimwe no kuvuga ko umuntu aba ari aho aryamiye amajanja umwanzi yaza noneho ukirwanaho.”

Dr. Muyombano avuga ko nta gitangaza ko uwakingiwe ashobora guhitanwa n’izindi ndwara zidakira.

Ati “Umwana wakingiwe iseru ashobora guhitanwa n’indwara y’umutima ibyo si ibintu twahakana ariko ntabwo ashobora guhitanwa n’indwara y’iseru, iyo afite umubiri ufite ubushobozi bwo kurwanya n’izindi ndwara. Ni ukuvuga ko niba urukingo rugeze mu mubiri washegeshwe n’izindi ndwara ari kanseri, ari SIDA ari indwara y’umutima , ari indwara y’impyiko yapfa azize iyo ndwara, kuko nubwo yaba yarakingiwe ariko ntabwo aba yarakingiwe kuri izo ndwara maze kuvuga.”

Kugeza kuri uyu wa kabiri hari hamaze gukingirwa abaturarwanda bagera ku bihumbi 391,001.

Inkuru ya Bosco Kwizera/RBA

One thought on “Uwakingiwe ashobora kwandura ariko ntabwo aremba – Minisitiri Ngamije”

Leave a Reply

Your email address will not be published. Required fields are marked *